’ہم سڑک پر ہی سوتے ہیں‘

بھگوتی کہتی ہیں، ’’اس جھاڑو کو سات مراحل میں بنایا جاتا ہے۔‘‘

حالانکہ بھگوتی صرف ۲۰ سال کی ہیں، لیکن وہ اپنے ہنر میں ماہر ہیں، جسے انہوں نے اپنی ماں اور دوسرے رشتہ داروں سے سیکھا تھا۔ انہوں نے اس رپورٹر کو بتایا، ’’پہلے ہم کھجور کی پتیوں کو درمیان سے پھاڑتے ہیں اور پھر پتیوں کے سرے کو اس سے الگ کر لیتے ہیں۔‘‘

وہ پتیوں کے سرے کو ’’ٹکڑے ٹکڑے‘‘ کہہ کر بلاتی ہیں، جو ایسے پتّے ہیں جو ایک بڑے پنکھ جیسے پتّے کا حصہ ہوتے ہیں۔ جھاڑو بنانے والے ہر پتّے کو کاٹتے ہیں اور پھر انہیں بنڈل میں باندھتے ہیں۔ اس کے بعد ان پتّوں کو بانس کی چھڑی پر کس کر پنّی سے لپیٹا جاتا ہے۔ آخر میں پتّوں کو پتلا کیا جاتا ہے اور کنارے کاٹے جاتے ہیں۔ بھگوتی جھاڑو بنانے کے مراحل بتاتی ہیں اور بیچ بیچ میں ان کی بہن دیولی بھی اپنی باتیں جوڑتی رہتی ہیں۔

دونوں خالہ زاد بہنوں کی عمر بیس کے آس پاس ہے اور انہیں جھاڑو بنانے کے تمام مراحل زبانی یاد ہیں۔ پنجاب کے ملوٹ میں بھگوتی اپنی ماں سونی دیوی اور دیولی کے ساتھ ایک فٹ پاتھ پر گھیرا بنا کر بیٹھی ہوئی ہیں۔ کسی خوبصورت رقص کی طرح وہ ہر مرحلہ کو بخوبی مکمل کرتی ہیں، باری باری سے اپنے حصہ کا کام نمٹا کر دوسرے کو اگلے مرحلہ کا کام سونپ دیتی ہیں۔

دیولی بڑی لگن کے ساتھ یہ روایتی کام کرتی ہیں۔ انہوں نے بتایا، ’’بچپن سے ہمیں جھاڑو بنانے میں بہت من لگتا تھا۔ اور اب بھی لگتا ہے۔‘‘ انہیں یہ ہنر ان کی ماں رکھمنی نے سکھایا تھا اور اب وہ تین چھوٹے بھائی بہنوں کو یہی کام سکھانے کے بارے میں سوچ رہی ہیں۔

بھگوتی بھی پورے جوش سے اس کام کو کرتی ہیں، لیکن اپنی بہن کے مقابلے وہ کہیں زیادہ پروفیشنل ہیں۔ وہ کہتی ہیں، ’’کیوں کہ جب محنت کریں گے تبھی تو کھانے کو ملے گا، اور محنت نہیں کریں گے تو کیا کھائیں گے؟‘‘ وہ اپنی ماں سونی دیوی سے ہمیشہ یہ سنتے ہوئے بڑی ہوئی ہیں، ’’اگر جھاڑو نہیں بنائیں گے تو ہم کھائیں گے کیا؟‘‘ یہی جذبہ جھاڑو بنانے والے دوسرے خاندانوں میں بھی ہے جو راجستھان کے میواڑ علاقہ سے پنجاب آئے ہیں۔

یہ فیملی کئی نسلوں سے جھاڑو بنانے کے کام میں لگی ہوئی ہے۔ سونی نے ۱۰ سال کی عمر میں اپنی ماں سے جھاڑو بنانا سیکھا اور پھر اپنے تینوں بچوں کو سکھایا۔ جب بھگوتی ۱۰ سال کی ہوئیں تو انہوں نے بھی جھاڑو بنانا شروع کر دیا۔

بھگوتی کہتی ہیں، ’’جب بھی ماں جھاڑو بناتی تھیں، تو مجھے بھی ایک پکڑا دیتی تھیں۔ میں کسی شاگرد کی طرح ان کی باتیں سنتی اور آنکھوں سے دیکھ کر سیکھتی تھی۔‘‘

دیولی ہنس کر کہتی ہیں، ’’اگر ہم سے کوئی غلطی ہو جاتی تھی تو یا تو ہمیں ماں سے ڈانٹ پڑتی تھی یا ہمیں مار پڑتی تھی۔‘‘

بھگوتی بھی ہنستے ہوئے بتاتی ہیں، ’’ڈر تو دونوں طرف سے تھا۔ ایک طرف ماں کی ڈانٹ اور دوسری طرف کھجور کی نوک دار پتیاں۔‘‘

فٹ پاتھ پر پتّوں اور جھاڑو کے درمیان بیٹھے تینوں لوگ کبھی کبھی سر اٹھا کر ہارن بجاتی بسوں کو دیکھتے ہیں، جو ملوٹ ٹرمینل پر آتی جاتی ہیں۔ شری مُکتسر صاحب، راجستھان سے کہیں زیادہ قریب ہے اور جنوب میں راجستھان اور مشرق میں ہریانہ کی سرحد سے ملحق ہے۔ یہ قصبہ اپنی پنجابی جوتیوں کے لیے مشہور ہے۔ پڑھیں: ’میرے جیسی جوتی کوئی نہیں بنا سکتا‘

لڑکیاں اس کام کو ’اوکھا‘ (مشکل) بتاتی ہیں اور ہر دن یہی کرتی ہیں۔ ان کی خانہ بدوش زندگی کے سبب اسکول جانا ممکن نہیں تھا – انہوں نے کبھی اسکول نہیں دیکھا۔

ان کے کام کا دن صبح ۱۰ بجے سے شام کے ۶ بجے تک چلتا ہے، حالانکہ بیچ بیچ میں کچھ دیر کا وقفہ بھی لیتی ہیں۔ بھگوتی کہتی ہیں، ’’ایک فیملی دن میں تقریباً ۲۰-۲۵ جھاڑو بناتی ہے۔‘‘ حالانکہ، جھاڑو بیچنا کافی سست رفتار عمل ہے۔ سونی اس رپورٹر کو بتاتی ہیں، ’’بیس پچیس جھاڑو بیچنے میں پانچ دن لگ جاتے ہیں۔ ہم ہر جھاڑو صرف ۱۰ یا ۱۵ روپے میں بیچتے ہیں۔‘‘

راہگیروں کی توجہ مبذول کرنے کے لیے جھاڑو کو سڑک پر لکڑی کے اسٹینڈ پر رکھا گیا ہے۔ دیولی کہتی ہیں، ’’ایسا تو نہیں ہے کہ جو کھجور کے پتّوں سے بنا جھاڑو پسند کرتا ہے وہی صرف روزانہ آ کر جھاڑو خریدے گا۔ آخر، جھاڑو تو ہر گھر میں پہلے سے ہوتا ہے۔‘‘

جب وہ بات کر رہی تھیں، تو اسی دوران ان کے پاس ایک ماں بیٹا جھاڑو خریدنے آئے، جس میں ماں نے اپنا نام سرجیت کور اور بیٹے کا اونکار بتایا۔ وہ جھاڑو خرید کر اسے یہاں سے ۱۶ کلومیٹر دور واقع اپنے گاؤں پکّی ٹِبّی میں بیچیں گے۔ اونکار کہتے ہیں کہ کھجور کے پتّوں سے بنا جھاڑو سیمنٹ کی اینٹوں والے فرش پر بہتر کام کرتا ہے۔ سرجیت کور کہتی ہیں، ’’باقی سارے جھاڑو صرف برابر سطح والی فرشوں کے لیے ٹھیک ہیں۔‘‘

گاہک چلے جاتے ہیں اور عورتیں پھر سے اپنے کام میں لگ جاتی ہیں۔

سونی کہتی ہیں، ’’یہاں روٹی پانی کمانے کے لیے آتے ہیں۔ ہمارے باپ دادا کی طرح۔‘‘

سونی اور ان کی فیملی کا تعلق باگڑیا برادری سے ہے، جو راجستھان کی حاشیہ پر زندگی بسر کرنے والی ایک خانہ بدوش برادری ہے۔ ان کی ریاست میں اس برادری کو پس ماندہ ذات کے طور پر درج کیا گیا ہے۔ سونی بتاتی ہیں، ’’ہمارے پاس راجستھان میں پختہ مکان نہیں ہے، بس ایک تھان [زمین کا چھوٹا ٹکڑا] ہے، جہاں ہم یہاں کی طرح ہی ڈیرہ ڈال کر رہتے ہیں۔‘‘

باگڑیا برادری ایک خانہ بدوش برادری ہے، اور پنجاب میں انہیں ڈی نوٹیفائیڈ ٹرائبس (ڈی این ٹی) کے طور پر درج کیا گیا ہے۔ منتھن کے بانی ڈائریکٹر تیجا رام مالی کہتے ہیں، ’’انہیں کسی زمانہ میں مجرم قرار دے دیا گیا تھا، سماج نے انہیں خود سے دور رکھا، جس سے ان کی ترقی مزید رک گئی۔ اب جب کہ قدرتی وسائل دستیاب نہیں ہیں، تو یہ زندہ رہنے کے لیے سماج کی طرف رخ کرنے کو مجبور ہیں۔‘‘ منتھن، راجستھان کے اجمیر ضلع میں واقع ایک غیر سرکاری تنظیم ہے، جو یہاں رہنے والی باگڑیا برادری کے لوگوں کے ساتھ کام کرتی ہے۔

سونی مزید کہتی ہیں، ’’راجستھان میں کوئی کام نہیں ہے۔ پانی بھی کم ہے۔ یہاں تک کہ ہمیں اسے خریدنا پڑتا ہے۔ یہاں ہمیں کھانا، پانی ملتا ہے، اور کچھ جھاڑو بیچنے کا بھی انتظام ہو جاتا ہے۔ یہاں تک کہ کھجور کے پتّے بھی مل جاتے ہیں، جن سے ہم جھاڑو بناتے ہیں۔‘‘

سونی اور ان کے شوہر سکھلال (دونوں ہی عمر کے چالیسویں پڑاؤ کو پار کر چکے ہیں) اپنے تین بچوں کے ساتھ راجستھان کے بھیلواڑہ ضلع کے گنگاپور گاؤں سے نکل کر اب تک ۷۰۰ کلومیٹر سے بھی زیادہ کا فاصلہ طے کر چکے ہیں۔ سونی کے ووٹر آئی ڈی کارڈ پر مستقل پتہ کے طور پر ’بس اسٹینڈ کے پاس، مالی کھیڑا گاؤں، بھیلواڑہ‘ درج ہے، جو ان کی غیر مستقل زندگی کی علامت ہے۔

وہ ملوٹ جانے کے لیے کئی ٹرینیں اور بسیں بدلتے ہیں۔ اب، جب ان کی بڑی بیٹی کی شادی ہو چکی ہے اور وہ اپنے کنبوں کی کفالت کر رہے ہیں، تو ان کے ساتھ صرف ان کی غیر شادی شدہ بیٹی بھگوتی رہ رہی ہے۔ وہ تینوں بس اسٹینڈ کے پاس ایک جھگی (عارضی جھونپڑی) میں رہتے ہیں۔

وہ عام طور پر مانسون کے آنے تک ملوٹ میں ہی قیام کرتے ہیں۔ جون جولائی میں جب برسات کا موسم شروع ہوتا ہے تو فٹ پاتھ پر رہنا ان کے لیے مشکل ہو جاتا ہے۔ اس کے علاوہ، اس دوران انہیں جو کھجور کے پتّے ملتے ہیں وہ بھیگنے سے کالے پڑ جاتے ہیں، جس سے جھاڑو بنانا مشکل ہو جاتا ہے۔ مانسون ختم ہونے کے بعد وہ پھر سے ملوٹ واپس آ جاتے ہیں۔

پچھلے سال، سونی کی بہن رکھمنی اور ان کے شوہر شنکر (۳۴) اپنے چار بچوں کو لے کر ان کے ساتھ رہنے آئے۔ وہ راج سمند ضلع کے کالیسریا گاؤں سے آئے تھے، جو سونی کے گاؤں سے ۵۰ کلومیٹر دور ہے۔ وہ سڑک کے اُس پار سونی کی جھگی کے ٹھیک سامنے ایک جھونپڑی بنا کر رہنے لگے۔

راجستھان کے میواڑ علاقہ سے آئے مہاجر مزدوروں کی اب ایسی چھ جھونپڑیاں ہیں، جو کھجور کے پتوں سے جھاڑو بنا کر اپنا گزر بسر کرتے ہیں۔ سونی نے بتایا کہ جھاڑو بنانے والے دوسرے کنبے بھی ان کی طرح وقتاً فوقتاً بھٹنڈا، جالندھر، موگا، جگراؤں، کوٹ کپورہ جیسے دوسرے شہروں میں جاتے ہیں۔ وہ کہتی ہیں، ’’ہم گھومتے ہوئے ایسی جگہوں پر جاتے ہیں۔ ہم کبھی بھی کسی ایک جگہ پر نہیں رکتے۔‘‘

سونی کی جھونپڑی کے پیچھے ایک عارضی غسل خانہ ہے۔ وہیں سے تھوڑے فاصلہ پر جھونپڑیوں کے پاس بیت الخلاء ہے۔ عورتوں کو، خاص کر حیض کے دوران کافی دقتوں کا سامنا کرنا پڑتا ہے۔ وہ سینیٹری نیپکن کے بجائے پرانے کپڑوں کا استعمال کرتی ہیں، کیوں کہ سینیٹری نیپکن ان کے لیے ایک ایسی لگزری ہے، جس کا خرچ وہ نہیں اٹھا سکتیں۔

ایسے کھلے میں رہنے میں ایک ڈر یہ بھی ہوتا ہے کہ انہیں کبھی بھی کوئی گاڑی کچل کر جا سکتی ہے۔ رکھمنی انتہائی بے بسی کے ساتھ کہتی ہیں، ’’سڑک پر سر رکھ کر سوتے ہیں۔ ہماری جھونپڑی سڑک سے زیادہ دور نہیں ہے، اور اگر کوئی حادثہ ہوا تو ہماری پوری فیملی ختم ہو سکتی ہے۔ لیکن ہمارے پاس دوسرا کیا متبادل ہے؟‘‘

سونی اور سکھلال کی جھونپڑی کے باہر اینٹوں کے ڈھیر پر ایک ٹین کا ڈبہ رکھا ہے، جسے چولہے کے طور پر استعمال کیا جاتا ہے۔ یہیں لکڑیاں جلا کر کھانا پکایا جاتا ہے۔ سکھلال کچے ٹماٹر کے ساتھ روٹی کھا رہے تھے، جسے وہ یہیں پاس کے ایک دکاندار سے ۱۰ روپے میں خرید کر لائے تھے۔ انہوں نے کہا، ’’ہم اسی طرح کھانا کھاتے ہیں۔‘‘

کھجور کے پتوں کے بنڈل، جنہیں پُلی کہا جاتا ہے، ان کی جھونپڑی کے سامنے فٹ پاتھ پر ترتیب سے رکھے ہوئے ہیں۔ سکھلال بتاتے ہیں، ’’ہم انہیں دھوپ میں کم از کم ۱۰ دنوں تک سُکھاتے ہیں، جب تک کہ ان کا رنگ سفید نہیں ہو جاتا۔‘‘

یہ ہمیشہ ممکن نہیں ہوتا۔ سونی بتاتی ہیں، ’’ہمیں انہیں پیچھے چھپا کر رکھنا پڑتا ہے، جب والمیکی [صفائی ملازم] ہمیں ڈانٹتے ہیں۔ کبھی کبھی وہ ہمارے پتے اور جھاڑو بھی لے جاتے ہیں۔‘‘

بھگوتی کہتی ہیں، ’’وہ پتوں کو کچرا کہہ کر جلانے کی دھمکی دیتے ہیں۔ ہم انہیں کیا کہہ سکتے ہیں؟ آخرکار، یہ سرکاری زمین ہے اور ہر مہینے ملازمین کو حکم دیا جاتا ہے کہ سڑک پر رکھی ہر چیز ہٹا دی جائے۔‘‘

جنوری کی سردی کی صبح جب فیملی سے پاری کی بات چیت ہو رہی تھی، وہیں پاس میں سڑک کی صفائی کر رہے ملازم نے فیملی کو دیکھ کر پوچھا، ’’آپ لوگ کب جا رہے ہو؟‘‘

سونی جسمانی معذوری کے ساتھ پیدا ہوئی تھیں، جس کی وجہ سے انہیں چلنے میں دقت پیش آتی ہے۔ ان کے ہاتھ بھی مڑے ہوئے ہیں، اس لیے وہ ہاتھوں سے بڑی مشکل سے کام کر پاتی ہیں۔ سونی اپنے اونی کرتے اور گھاگھرا کے اوپر شال اوڑھے ہوئے بیٹھی تھیں۔ وہ اپنی جسمانی معذوری کے بارے میں کہتی ہیں، ’’میرے لیے خود سے بیٹھنا اور چلنا مشکل ہے۔ میری بیٹی، بھگوتی، میری مدد کرتی ہے۔‘‘

انہیں پچھلے کچھ مہینوں سے پیٹ میں درد کی بھی شکایت ہے۔ فیملی نے ایک پرائیویٹ کلینک میں ان کے علاج اور دواؤں پر ۱۵۰۰ روپے خرچ کیے ہیں۔ ڈاکٹر نے انہیں الٹرا ساؤنڈ کروانے کی صلاح دی، لیکن ان کے پاس اتنے پیسے نہیں ہیں۔ وہ کہتی ہیں، ’’ہمارے پاس ایک کپ چائے بنانے کے بھی پیسے نہیں ہیں۔‘‘

سرکاری اسپتال قریب میں ہی ہے، لیکن سونی مفت علاج کا فائدہ نہیں اٹھا سکتیں کیوں کہ ان کے پاس آدھار کارڈ نہیں ہے۔ ان کے پاس بطور شناختی کارڈ صرف ووٹر آئی ڈی کارڈ ہے، جو پچھلے سال جاری ہوا تھا۔

سکھلال کو پتھری ہے اور جب بھی ان کے پاس علاج کے پیسے ہوتے ہیں، وہ پاس کے ایک پرائیویٹ کلینک جاتے ہیں۔ ان کی سب سے چھوٹی بیٹی، بھگوتی کو بھی پتھری ہو چکی ہے۔ پچھلے سال، فیملی نے اس کے علاج کے لیے اپنے گاؤں کے ایک پڑوسی سے ۴۰ ہزار روپے کا قرض لیا تھا۔ وہ اب تک اُس قرض کو لوٹانے میں جدوجہد کر رہی ہیں۔

فیملی کا ارادہ ہولی (جو اس سال ۱۴ مارچ کو تھی) کے بعد راجستھان لوٹنے کا تھا، تاکہ وہ اپنا آدھار کارڈ بنوا سکیں اور پنشن برائے معذوری کے لیے درخواست دے سکیں۔ پنجاب میں قیام پذیر یہ تمام مہاجرین کنبے جب راجستھان لوٹتے ہیں، تو ان کے پاس تقریباً ۱۰ سے ۱۲ ہزار روپے کی بچت ساتھ ہوتی ہے۔

بھگوتی اور دیولی جھاڑو کی اپنی دکان کے سایہ میں سڑک پر پتھروں سے لوڈو کھیل رہی ہیں۔ وہیں ان کے پاس بیٹھی رکھمنی ٹھنڈی سانس بھرتے ہوئے کہتی ہیں، ’’ہم نے تو کبھی ایک لاکھ بھی نہیں دیکھا۔ ایک لاکھ کتنا ہوتا ہے، ہم نے کبھی دیکھا بھی نہیں ہے۔ دیکھا ہوتا، تو شاید ہم مر بھی جاتے۔‘‘

ترجمہ نگار: قمر صدیقی