میل گھاٹ کے باگھ دیوتا

ہماری کورکو برادری کا عقیدہ ہے کہ اگر باگھ میدان میں آجائے تو یہ ایک نیک شگون ہے۔ اس کے قدموں کے نشان کسان کی خوشحالی کی طرف اشارہ کرتے ہیں۔ ہر طرف خوشحالی کی۔

میرا نام رام لال ہے اور میں مہاراشٹر کے میل گھاٹ ٹائیگر ریزرو (ایم ٹی آر) کے بفر علاقہ کے گاؤں پائے وِہیر میں پیدا ہوا تھا۔ اور میں، وسنت، ایم ٹی آر کے مرکزی علاقہ میں واقع بورٹیا کھیڑا گاؤں میں رہتا ہوں۔ ہم دونوں کورکو قبائلی ہیں، اور ہمارے خاندان کئی نسلوں سے ان جنگلوں میں آباد ہیں۔

ہم اس شعور کے ساتھ بڑے ہوئے ہیں کہ گایوں اور بیلوں کے گوبر پر باگھ کے پنجوں کے نشانات کا ملنا ایک نیک شگون ہے۔ اگر گوبر کے نشان والے ٹکڑے کو غلہ خانہ میں رکھ دیا جاتا ہے، تو اس کی موجودگی گھر میں اناج کی کمی نہیں ہونے دیتی۔

ہم مکئی، جوار، دھان، گندم، باجرا، سویابین، مونگ پھلی، سورج مکھی، تل، مٹر، مونگ، چنے اور دیگر دالیں اگاتے ہیں۔ ان میں سے زیادہ تر ہم خود استعمال کر لیتے ہیں اور جو تھوڑا سا حصہ باقی بچ جاتا ہے تو اسے فروخت کر دیتے ہیں۔ ہماری برادری کے زیادہ تر کسانوں کے پاس جنگل کی زمین کی کاشت کے لیے جنگلات کے انفرادی حقوق ہیں۔ ہم بارش پر انحصار کرتے ہیں لیکن آبپاشی کے لیے قریبی ندی نالوں اور کنوؤں کا پانی بھی استعمال کرتے ہیں۔

اس ٹائیگر ریزرو میں جنگل سفاری پر جانے والے سیاح جنگل میں باگھ کو دیکھ کر بہت خوش ہوتے ہیں اور فخر محسوس کرتے ہیں، یہاں تک کہ خود کو ٹائیگر کہنے لگتے ہیں!

لیکن ہم کورکو لوگوں کا خیال ہے کہ باگھ کا بار بار نظر آنا اچھی بات نہیں ہے: ’’کولا ماما آم چولاکا باکی دوگو [باگھ ماموں، کبھی نظر نہ آنا]۔‘‘ کورکو زبان میں، ہم باگھ کو ’ماما‘ کہہ کر مخاطب کرتے ہیں۔ ہم اس ماں کو تسلیم کرتے ہیں جو باگھ کو ماموں یا ’ماما‘ (جو تحفظ فراہم کرتا ہے) کہہ کر مخاطب کرتے ہوئے جنم دیتی ہے۔

لہذا، بھلے ہی ہم اپنے کھیتوں میں اس کی موجودگی کا خیرمقدم کرتے ہیں، لیکن ہم باگھ کو دیکھنا نہیں چاہتے۔

ایک اندازہ کے مطابق، ایم ٹی آر میں تقریباً ۳۰ سے ۳۹ باگھ ہیں۔ ایم ٹی آر مہاراشٹر اور مدھیہ پردیش میں ستپوڑہ پہاڑی سلسلے کی بنیاد پر واقع ہے، جو وسطی ہندوستان میں خشک پت جھڑ والے جنگل کے ۲۷۶۹ مربع کلومیٹر رقبہ میں پھیلا ہوا ہے۔

]اس جنگل میں صرف باگھ ہی نہیں بلکہ تیندوے، جنگلی کتے، دھاری دار لکڑ بگھے، بھیڑیے، گیدڑ، لومڑی، ریچھ، سانبھر ہرن، نیل گائیں، جنگلی بھینسیں، پینگولن، چار سینگوں والے ہرن، جنگلی سؤر، ہندوستانی غزال، بندر وغیرہ موجود ہیں۔[

ہم کورکو لوگوں کا عقیدہ ہے کہ انسانوں پر حملہ کرنے والے باگھ وہ نہیں ہیں جن کے ساتھ ہم جنگلوں میں پلے بڑھے ہیں۔ وہ باہر سے آئے ہیں۔

حالیہ دنوں میں ہم نے دیکھا ہے کہ باگھوں کے حملوں کے زیادہ تر شکار ۲۰ سے ۳۵ سال کی عمر کے نوجوان ہوتے ہیں۔ وہ جنگل اور جانوروں کے بارے میں اتنی سمجھ نہیں رکھتے جتنی جنگل کے اندر پلے بڑھے عمر رسیدہ لوگ رکھتے ہیں۔

نوعمر افراد نہیں جانتے کہ باگھوں کے ساتھ کیسے برتاؤ کرنا ہے، یا اس کا اندازہ کیسے لگانا چاہیے کہ ان کے آس پاس کوئی باگھ ہے یا نہیں، وہ کچھ نہیں جانتے ہیں۔ یہی لوگ بڑے پیمانے پر حملوں کا شکار ہوتے ہیں، جو اس حقیقت کو نظر انداز کرتے ہیں کہ باگھ آس پاس ہی موجود ہیں۔ وہ کم عمری میں جنگل میں نہیں رہے ہیں۔

وہ نہیں جانتے کیونکہ ۲۵ سالوں سے جب سے میل گھاٹ ٹائیگر ریزرو بنا ہے، یہ جنگلات ہمارے لیے بند ہو گئے ہیں۔ انہیں باہر رکھا گیا ہے، لہذا جب وہ اندر جاتے ہیں، تو وہ نہیں جانتے کہ کیسے برتاؤ کرنا ہے۔

]ٹائگر ریزرو کے اندر اور اس کے گرد و نواح میں رہنے والے لوگوں کے لیے، روز افزوں بنیادی ڈھانچہ کے منصوبوں نے مقامی ماحولیات کو تبدیل کر دیا ہے، جس سے ان کے معاش میں بحران پیدا ہو گیا ہے۔ اس کی وجہ سے مقامی برادری جنگل کی پیداوار پر زیادہ انحصار کرنے پر مجبور ہو رہی ہے، جس کی وجہ سے انسانی اور جنگلی حیات کے ممکنہ تصادم میں اضافہ ہو رہا ہے۔ دوسری طرف، وسطی ہندوستان کے منظر نامہ پر باگھوں کی آبادی بڑھتی جا رہی ہے، جو ٹائگر ریزرو سے نکل کر بفر ژون، کھیتوں اور باہر دیہاتوں میں پھیل رہی ہے۔ اسٹیٹس آف ٹائگرز ۲۰۲۲ کے مطابق، ہندوستان میں ۳۶۸۲ باگھوں میں سے ۱۴۳۸ وسطی ہندوستان اور مشرقی گھاٹوں میں رہتے ہیں، اور تاڈوبا-اندھاری ٹائیگر ریزرو میں باگھوں کی آبادی میں خاطر خواہ اضافہ دیکھا گیا ہے۔[

جب ہماری برادری کا کوئی شخص اپنی گائے اور بھینسیں چرانے اور جنگل کی معمولی پیداوار لانے جنگل جاتا ہے تو گاؤں ان کی اور جانوروں کی حفاظت کے لیے ایک عوامی پوجا کا بندوبست کرتا ہے۔

]باگھ ان کئی دیوتاؤں میں سے ایک ہے جن کی میل گھاٹ کے قبائلی پوجا کرتے ہیں۔[

اگر ہمیں یہ احساس ہوتا ہے کہ گاؤں میں باگھوں کے حملوں میں اضافہ ہوا ہے، تو پنچایت تقریباً ۵۰ سے ۱۰۰ روپے کا چندہ طلب کرے گی۔ یہ رقم ناریل، کھاریک [چھوہارا]، لیموں، جھنڈیاں، چینی، اگربتی، روا [سوجی]، خوردنی تیل، بوکُڈ [بکرا]، مرچ، زیرہ، ہلدی، ٹماٹر، نمک، پیاز، لہسن، چاول وغیرہ خریدنے میں استعمال ہوتی ہے۔

باگھ دیوتا کو ایک بکرا پیش کیا جاتا ہے، اور ایک سندور لگا ناریل بھومکا [تقریب کو انجام دینے والے پجاری] کو دیا جاتا ہے۔

وہ پرارتھنا کرتا ہے: ’’ہم آپ کو یہ چڑھاوا پیش کرتے ہیں۔ براہ کرم ہمارے گاؤں کے علاقہ کو چھوڑ دیں اور ہمارے جانوروں کو نقصان نہ پہنچائیں۔‘‘

پجاری کی اس پرارتھنا کے بعد، تقریب کے لیے جمع گاؤں کے بزرگوں اور نوجوانوں (عام طور پر مردوں ) کے ذریعہ پرساد [عبادت کے لیے کھانا] پکایا جاتا ہے اور اسے واڑی میں تقسیم کیا جاتا ہے۔ [واڑی سال یا پلاش کے درخت کے پتے ہوتے ہیں جو کھانا تقسیم کرنے کے لیے استعمال میں لائے جاتے ہیں]۔

سبھی کھانا کھانے کے لیے بیٹھتے ہیں۔ قبائلی سردار اعلان کرتا ہے کہ کھانا کھاتے وقت کوئی شخص آپس میں بات نہیں کرے گا، ورنہ بات کرنے والے کو پوجا کا سارا خرچ برداشت کرنا پڑے گا! اس کی ایک وجہ یہ ہے کہ ہمارا ماننا ہے کہ اگر کوئی پوجا کے بارے میں کھانے کے دوران بات کرے گا تو تقریب منسوخ ہو جائے گی۔ یہ ہمارا عقیدہ ہے۔

لہٰذا کھانے کے بعد ہی لوگ باتیں کرنا شروع کرتے ہیں۔

یہ پوجا آنے والی نسل کو یہ پیغام دیتی ہے کہ باگھ ہمارے دیوتاؤں میں سے ایک ہیں، اور ہمیں ان کا احترام کرنا چاہیے۔ ہمارے آباء و اجداد اس کی پوجا کرتے رہے ہیں۔

میل گھاٹ میں واقع ہمارے گاؤں گرگوٹی میں برادری کے لوگوں نے باگھ دیوتا کی پتھر کی مورتی نصب کی ہے۔ یہ کورکو برادری کے لیے ایک زیارت گاہ ہے، جہاں وہ چیت کے مہینہ میں [اپریل کے آس پاس] آتے ہیں۔

جب قبائلی کورکو برادری جنگل میں جاتی ہے تو ایک پرندہ جسے ہم ’چیوِچ‘ کہتے ہیں، آوازیں نکال کر ہمیں خبردار کرتا ہے کہ باگھ قریب ہے۔ پرندے کی آواز سن کر ہم اندازہ لگا سکتے ہیں کہ آیا باگھ ۱۰۰ میٹر دور ہے یا ۲۰۰ میٹر۔ پھر ہم اپنا راستہ بدل کر کہیں اور چلے جاتے ہیں۔

اس طرح ہم اپنے جنگلات کو محفوظ رکھتے ہیں، اپنے جانور محفوظ رکھتے ہیں، اور برادری بھی محفوظ رہتی ہے۔

مصنفین نے یہ اسٹوری مقامی زبان اور مراٹھی میں بیان کی تھی۔ قوسین کے اندر جو اضافہ کیا گیا ہے، وہ پاری کی ادارتی ٹیم نے کیا ہے۔

مصنفین ٹی ڈی یو بنگلور میں کو ایگزسٹینس فیلو شپ پروگرام ۲۰۲۳-۲۰۲۵ کا حصہ تھے۔

ترجمہ نگار: شفیق عالم