پیپلز فوٹوگرافرز کلیکٹو کے سات عجوبے

’’اے سی کمروں میں منعقد ہونے والی نمائشیں، جو یہ دعویٰ کرتی ہیں کہ وہ محروم اور حاشیے پر رہنے والی برادریوں کی نمائندگی کرتی ہیں، درحقیقت ان لوگوں کے لیے خوش آئند نہیں ہوتیں جن کی زندگیوں اور مسائل کو ان کا فن بیان کرتا ہے۔ ایک بار مجھے اپنے کورس کی ضرورت کے تحت دہلی میں ایک آرٹ نمائش دیکھنے جانا پڑا۔ وہاں ہال میں تصاویر، مجسمے اور پینٹنگز موجود تھیں جو محروم لوگوں کی زندگیوں پر مبنی تھیں، مگر پورے ماحول میں اشرافیہ (ایلیٹ) کی ایسی جھلک تھی کہ میں خود کو وہاں بہت اجنبی اور الگ تھلگ محسوس کر رہی تھی،‘‘ ۲۲ سالہ حیرالنشاء اپنی خلوص سے بھری آواز میں کہتی ہیں۔

’’ذرا سوچیں، اگر کسی ایسی برادری سے تعلق رکھنے والا شخص، جو پہلے سے ہی سماجی طور پر نظرانداز کیا جاتا رہا ہے، وہاں پہنچ جائے تو وہ کیسا محسوس کرے گا؟ مجھے نہیں لگتا کہ وہ اس جگہ کو اپنا سمجھ سکے گا۔ اگر میں کبھی کوئی نمائش منعقد کروں، تو میں اسے بالکل مختلف انداز میں پیش کروں گی۔ صرف دیواروں پر تصاویر آویزاں کرنے اور کسی کے ان کے بارے میں گفتگو کرنے تک محدود نہیں رہوں گی۔ میں ان حقیقی لوگوں کو بھی وہاں لاؤں گی جن کی زندگیوں کو یہ تصاویر بیان کرتی ہیں، تاکہ وہ دوسروں سے براہِ راست بات چیت کر سکیں۔ اس کے ساتھ ہی میں نمائش کی جگہ کو ان مناظر اور ماحول سے بھی جوڑوں گی جن کی عکاسی یہ تصاویر کرتی ہیں۔‘‘ وہ تیزی سے اپنے خیالات پیش کر رہی ہیں۔ حیرالنشاء کے پاس صرف ۲۰ منٹ ہیں، اس کے بعد انہیں یونیورسٹی کے ایک پروگرام میں واپس جانا ہے جہاں وہ نظامت کے فرائض انجام دینے والی ہیں۔

جامعہ ملیہ اسلامیہ، نئی دہلی سے ماس کمیونیکیشن میں ماسٹرز کی تعلیم حاصل کرنے والی حیرالنشاء شمالی چنئی کے ایک مسلم خاندان سے تعلق رکھنے والی اپنے خاندان کی پہلی طالبہ ہیں جنہیں اعلیٰ تعلیم حاصل کرنے کا موقع ملا ہے۔ وہ کہتی ہیں، ’’میں اپنے علاقہ سے پہلی لڑکی ہوں جو اتنی دور آکر تعلیم حاصل کر رہی ہے۔ ہماری برادری میں خواتین کو عموماً گھر تک محدود رہنے کی ترغیب دی جاتی ہے اور انہیں گریجویشن کرنے کی حوصلہ افزائی نہیں کی جاتی۔ جیسے ہی میری عمر ۱۸ سال ہوئی، مجھ پر شادی کرنے کا دباؤ بڑھنے لگا۔ لیکن میں وہاں سے نکل آئی۔ فوٹوگرافی نے مجھے یہ احساس دلایا کہ اس دنیا کے باہر بھی ایک بہت بڑی دنیا موجود ہے۔‘‘

یہ وہی دنیا ہے جسے فتح کرنے کا خواب ان کی بہن نور نشاء کے بھی دیکھتی ہیں۔ ’’کورونا کے دنوں میں، جب اسکول بند تھے اور میں وقت گزارنے کے لیے کوئی مصروفیت تلاش کر رہی تھی، تب میں نے پلنی انّا کی فوٹوگرافی ورکشاپ میں شرکت کی،‘‘ ۲۰ سالہ نور نشاء یاد کرتے ہوئے کہتی ہیں۔ ’’یہ میری زندگی کا پہلا موقع تھا جب میں نے ایک ڈی ایس ایل آر کیمرہ دیکھا اور اسے ہاتھ لگایا۔ اور جب میں نے اپنی تصاویر کو ری فریمنگ نارتھ چنئی نمائش میں آویزاں دیکھا، تب پہلی بار میرے ذہن میں یہ خیال آیا کہ فوٹوگرافی کو بطور مستقل پیشہ اختیار کیا جا سکتا ہے۔ اس سے پہلے تو میں فیشن ڈیزائنر بننے کے بارے میں سوچ رہی تھی،‘‘ وہ ہنستے ہوئے کہتی ہیں۔

نور نشاء کے لیے فوٹوگرافی آزادی کا ایک ذریعہ ہے، اور آج بھی وہ اسے اسی نظر سے دیکھتی ہیں۔ لیکن ان کی مراد صرف اپنی ذاتی آزادی نہیں، بلکہ اپنے اردگرد کی دنیا سے جڑنے، معاشرے کو کچھ واپس دینے اور لوگوں کے نقطۂ نظر کو بدلنے کا ایک وسیلہ ہے۔ وہ کہتی ہیں، ’’ہندوستان میں بہت کم ادارے ایسے ہیں جہاں فوٹوگرافی کو جدید اور ترقی پسند انداز میں پڑھایا جاتا ہے۔ میں بیرونِ ملک جا کر تعلیم حاصل کرنا چاہتی ہوں۔ بچپن میں مجھے لگتا تھا کہ میرا گھر ہی میری دنیا کی آخری حد ہے، مگر اب فوٹوگرافی نے میرے سامنے ایک لامحدود دنیا کھول دی ہے۔ یہ ایسا ذریعہ ہے جس سے میں دنیا کو دریافت کر سکتی ہوں اور ہر روز نئی چیزیں سیکھ سکتی ہوں۔‘‘

تاہم، اس منزل تک پہنچنے کا سفر ہرگز آسان نہیں رہا۔ سال ۲۰۱۳ میں والد کے انتقال کے بعد ان کی والدہ کو دونوں بیٹیوں کی تعلیم جاری رکھنے کے لیے بے حد محنت کرنا پڑی۔ کئی برسوں تک انہوں نے طویل اوقات تک کام کیا، اپنی بیٹیوں کے ساتھ گزارنے والا وقت قربان کیا، مگر اس بات کو یقینی بنایا کہ دونوں لڑکیوں کو وہ تعلیم ملے جس کی وہ مستحق تھیں۔

ڈیجیٹل جرنلزم میں بی ووک کی ڈگری مکمل کرنے کے بعد، نور نے لندن میں فوٹوگرافی کے مختلف تعلیمی پروگراموں کے لیے درخواستیں دیں۔ انہیں ۱۰ مختلف اداروں سے داخلے کی پیشکش بھی موصول ہوئی، مگر وہ کسی بھی ادارہ سے وظیفہ (اسکالرشپ) حاصل نہ کر سکیں۔ وہ پُرامید لہجے میں کہتی ہیں، ’’میں کوشش جاری رکھوں گی۔ اور جب تک مجھے یہ موقع نہیں ملتا، میں کلیکٹو (اجتماعی فوٹوگرافی گروپ) کے ساتھ بطور فوٹوگرافر کام کرتی رہوں گی اور ایسے پروجیکٹوں پر کام کروں گی جن سے مجھے خوشی ملتی ہے۔ جس تازہ ترین پروجیکٹ پر میں کام کر رہی ہوں، اس میں حیرالنشاء اور سُبا بھی میرے ساتھ شامل ہیں۔‘‘

سُبا گومتی ایم (۲۶)، تمل ناڈو کے تینکاسی ضلع کے شنکرن کوول گاؤں سے ہیں۔ وہ کہتی ہیں، ’’میرا تعلق ایک دیہی پس منظر سے ہے۔ میرے والد گاؤں میں ایک دکان چلاتے ہیں اور میری والدہ گھریلو خاتون ہیں۔ نہ میرے والدین اور نہ ہی گاؤں کے لوگوں کو صحافت یا فوٹوگرافی کے شعبے کے بارے میں زیادہ معلومات یا تجربہ تھا۔‘‘ تین بہن بھائیوں میں سب سے چھوٹی سُبا کہتی ہیں کہ وہ ہمیشہ اپنے فیصلوں پر قائم رہنے کا حوصلہ رکھتی ہیں۔

وہ بتاتی ہیں، ’’جب میں نے پہلی بار اپنے والدین سے کہا کہ میں صحافت پڑھنا چاہتی ہوں تو وہ بالکل خوش نہیں ہوئے۔ انہوں نے کہا، ’ہم نہیں چاہتے کہ تم ان عورتوں کی طرح بنو جو سڑکوں پر کھڑی ہو کر تصویریں کھینچتی ہیں۔ ہمیں یہ پسند نہیں۔‘ انہوں نے اصرار کیا کہ میں بزنس ایڈمنسٹریشن (بی بی اے) کے کورسز کے لیے درخواست دوں۔‘‘ سُبا نے والدین کی بات مان لی، لیکن بی بی اے کی تمام درخواستوں کے درمیان خاموشی سے صحافت کے بی اے پروگرام کے لیے بھی ایک درخواست جمع کرا دی۔ بعد میں انہیں دو مختلف کالجوں میں داخلہ مل گیا – ایک میں بی بی اے کے لیے اور دوسرے میں بی اے صحافت کے لیے۔ اس کے بعد ان کے والدین نے آخرکار رضامندی ظاہر کر دی۔ ’’اور آپ جانتی ہیں کیوں؟ کیوں کہ صحافت کا کورس ایک ایسے کالج میں تھا جہاں صرف طالبات پڑھتی تھیں، جب کہ باقی کالج مخلوط (کو ایڈ) تھےٍ!‘‘ وہ مسکراتے ہوئے کہتی ہیں۔ اس کے بعد ان کے سفر کو کوئی نہیں روک سکا۔

صحافت میں ماسٹرز مکمل کرنے کے بعد سبا کو مرکزی دھارے کے میڈیا اداروں میں ملازمتیں مل گئیں۔ لیکن جہاں بھی وہ کام کرنے گئیں، والدین کی تشویش ان کے ساتھ رہی۔ اکثر ایسا ہوتا کہ رپورٹنگ یا فوٹوگرافی کے لیے جاتے وقت ان کا بھائی یا خاندان کا کوئی مرد رشتہ دار ان کے ساتھ جاتا۔ تاہم، ۲۰۲۴ میں پیپلز فوٹوگرافرز کلیکٹو سے وابستہ ہونے کے بعد حالات بدلنے لگے۔ ان کے والدین نے ان کے کام کی اہمیت کو سمجھنا شروع کیا اور سبا نے بھی فوٹوگرافی کے بارے میں اپنا ایک منفرد اور گہرا نقطۂ نظر تشکیل دیا۔

اس کلیکٹو کے ساتھ مختلف علاقوں کا سفر کرتے ہوئے سبا نے تلنگانہ، مدھیہ پردیش اور تمل ناڈو کے آدیواسی اور دلت طلبہ کو فوٹوگرافی کی ٹریننگ دی۔ ’’آخرکار مجھے محسوس ہوا کہ میں صحیح جگہ پر پہنچ گئی ہوں۔ اب میں ایک دستاویزی فوٹو جرنلسٹ بننے کی تربیت حاصل کر رہی ہوں – ایسی صحافی جو لوگوں کے ساتھ کھڑی ہو اور انہی کی آواز بنے۔ میرے گاؤں میں کوئی خاتون صحافی نہیں ہے، اور مجھے کم عمر لڑکیوں کو فوٹوگرافی سکھانے میں بے حد خوشی ملتی ہے۔‘‘ تینکاسی کے گورنمنٹ ماڈل اسکول میں منعقد ہونے والی ایک فوٹوگرافی ورکشاپ کے دوران ہی ان کی ملاقات کیرتی سے ہوئی۔

کیرتی ایس (۱۶) اس باصلاحیت گروہ کی کم عمر ترین ارکان میں سے ایک ہیں۔ وہ تینکاسی ضلع کے مایامن کُریچی گاؤں میں رہتی ہیں اور اس وقت بارہویں جماعت کی طالبہ ہیں۔ وہ کہتی ہیں، ’’اسکول میں فوٹوگرافی سیکھنے کے بعد اس شعبے کے بارے میں میرا تصور مکمل طور پر بدل گیا۔ پہلے میں سمجھتی تھی کہ فوٹوگرافی صرف بڑی تقریبات اور شادیوں کی تصویریں لینے کا نام ہے، لیکن اب مجھے معلوم ہوا ہے کہ یہ صرف خوش چہروں کو محفوظ کرنے تک محدود نہیں، بلکہ عام لوگوں کی روزمرہ کی زندگی کو دستاویزی شکل دینے کا بھی ایک ذریعہ ہے۔ میرے پاس اپنا کیمرہ نہیں ہے، اس لیے میں اپنے موبائل فون سے گاؤں کے کھیتوں میں محنت کرتی ہوئی اپنی دادی اور ان کی سہیلیوں کی تصاویر کھینچتی ہوں۔‘‘ کیرتی ابھی ابھی اسکول سے ایک طویل دن گزار کر واپس آئی ہیں، لیکن جیسے ہی ان سے فوٹوگرافی کے بارے میں بات کی جاتی ہے، ان کی آواز جوش و جذبے سے بھر جاتی ہے۔

اس کے باوجود وہ فوٹوگرافی کو اپنے مستقبل کا پیشہ نہیں بنانا چاہتیں۔ وہ کہتی ہیں، ’’مجھے فوٹوگرافی کے پروجیکٹوں پر کام کرنا بہت پسند ہے، لیکن میرا خواب کارگو آفیسر بننا ہے۔ میرے والد بھی اس فیصلہ سے خوش نہیں ہیں۔ وہ چاہتے ہیں کہ میں کلپنا چاولہ کی طرح خلا باز بنوں۔ وہ تو مجھے مذاق میں ’کیرتی چاولہ‘ کہہ کر پکارتے ہیں۔ لیکن میرا دل ٹرانسپورٹیشن، ہوابازی اور کارگو مینجمنٹ کے شعبے میں لگتا ہے۔ ابھی کل ہی داخلوں کی فہرست جاری ہوئی ہے، اور میرا داخلہ انڈین میری ٹائم یونیورسٹی میں ہو گیا ہے۔ اب میں میری ٹائم لاجسٹکس میں بی بی اے کی تعلیم حاصل کروں گی۔‘‘

سمندری لاجسٹکس کی تعلیم حاصل کرنے کا ان کا خواب اور فوٹوگرافی سے محبت ایک دوسرے کے ساتھ بخوبی ہم آہنگ ہیں۔ ان کے مطابق فوٹوگرافی وہ کام ہے جس سے انہیں حقیقی خوشی ملتی ہے۔ وہ تقریباً آٹھ سال کی تھیں جب ان کے والد ایک حادثہ کا شکار ہو گئے۔ جزوی صحت یابی کے باوجود ان کے والد اور پورے خاندان کی زندگی پہلے جیسی نہ رہ سکی۔ اس کے بعد ان کی والدہ نے گھر کی ذمہ داریوں کے ساتھ ساتھ خاندان کی چھوٹی سی پنساری کی دکان بھی سنبھال لی۔ جب کیرتی نے پہلی بار کیمرہ اٹھایا تو انہوں نے سب سے پہلے اپنی والدہ کی زندگی کو تصویروں میں محفوظ کیا۔ وہ کہتی ہیں، ’’ہر فیملی کے کسی کامیاب فرد کی کامیابی کے پیچھے کوئی نہ کوئی ایسا شخص ضرور ہوتا ہے جو خاموشی سے قربانیاں دے رہا ہوتا ہے۔ میری فوٹوگرافی ان خاموش محنت کرنے والوں کو خراجِ تحسین پیش کرنے کا ایک ذریعہ ہے، اور ہمیشہ رہے گی۔‘‘

اگر کیرتی کی باتیں مکیش سن رہے ہوتے تو شاید وہ ان سے مکمل اتفاق کرتے۔ کے مکیش بھی اس باصلاحیت گروہ کے ایک اور نوجوان رکن ہیں۔ ان کا تعلق تمل ناڈو کے ویلور ضلع کے میلموئل گاؤں سے ہے۔ وہ بھی صرف ۱۶ سال کے ہیں اور اس وقت گورنمنٹ ماڈل اسکول، ویلور سے بارہویں جماعت مکمل کر رہے ہیں۔ ان کا فوٹوگرافی کا سفر بھی اپنے والد، ایک خاموش محنت کش، کو خراجِ تحسین پیش کرنے سے شروع ہوا۔ ’’میرے والد بہت خاموش طبع انسان ہیں۔ گھر میں وہ مجھ سے زیادہ میری بہن سے بات کرتے ہیں۔ جہاں تک میں نے دیکھا ہے، میرے والدین بھی آپس میں زیادہ گفتگو نہیں کرتے۔ اگر میری والدہ میرے والد سے کوئی کام کرنے کو کہیں تو وہ بس خاموشی سے کر دیتے ہیں، بس اتنی ہی بات ہوتی ہے۔ وہ گاؤں کے دوسرے لوگوں سے بھی زیادہ بات نہیں کرتے۔‘‘ یہی وہ باتیں ہیں جو مکیش نے اپنی تصویری کہانی (فوٹو اسٹوری) میں لکھی ہیں۔ اس کہانی کے لیے وہ ہاتھ میں کیمرہ لے کر اپنے والد کے ساتھ ان کے کام کی جگہ، یعنی پتھر کی کان تک گئے اور ان کی روزمرہ کی زندگی کو تصویروں میں قید کیا۔

مکیش نہایت شرمیلے انداز میں، دھیمی آواز اور بہت کم الفاظ میں فوٹوگرافی سے اپنی محبت، اپنے والدین کے لیے احترام اور اپنی تحریک کے بارے میں بات کرتے ہیں۔ وہ بتاتے ہیں کہ انہیں سب سے زیادہ متاثر پلنی انّا کی اپنی والدہ پر مبنی تصویری کہانی نے کیا، جسے ان کے اسکول کے فوٹوگرافی کے تربیت کار نے طلبہ کو پڑھنے کے لیے دیا تھا۔ وہ اس لینس کے بارے میں بھی بات کرتے ہیں جس نے انہیں اپنی زندگی اور اپنے والد کی زندگی کو ایک نئے زاویے سے دیکھنا سکھایا۔ وہ کہتے ہیں، ’’اسکول کی تعلیم مکمل کرنے کے بعد میں فوٹوگرافی کو جاری رکھنا چاہتا ہوں۔ اس وقت میں ویلور کے روایتی دھوبی برادری کے لوگوں کی زندگیوں کو دستاویزی شکل دے رہا ہوں۔ مجھے فوٹوگرافی کی کلاس اور اورُکّو اُورو کُڈی [ہر گاؤں میں ایک فیملی] نامی کتاب سے بہت تحریک ملی۔‘‘

مکیش بہت کم بولتے ہیں اور ایسا محسوس ہوتا ہے کہ وہ ہمارے درمیان موجود فاصلے اور اس حقیقت سے بھی آگاہ ہیں کہ ہم دونوں مختلف زبانوں میں بات کرتے ہیں۔ لیکن جب میں ان کی تصاویر دیکھتی ہوں تو مجھے احساس ہوتا ہے کہ مکیش اگرچہ الفاظ میں کم بات کرتے ہیں، مگر ان کی تصویریں بہت کچھ بیان کرتی ہیں۔ فوٹوگرافی ہی ان کی زبان بن چکی ہے۔

پڈوکوٹئی کے کوٹ منگلم گاؤں کے ۳۲ سالہ کارتکیئن آر کے لیے زبان کا مسئلہ کچھ مختلف تھا۔ وہ ۲۰۱۵ سے ۲۰۲۱ کے درمیانی برسوں کا ذکر کرتے ہوئے مجھ سے انگریزی میں کہتے ہیں، ’’اس وقت مجھے صرف تمل زبان آتی تھی۔ انگریزی کی زیادہ سمجھ نہیں تھی، اسی لیے کالج میں مجھے بہت مشکلات کا سامنا کرنا پڑا۔‘‘ سال ۲۰۱۵ میں چار سالہ انجینئرنگ کی تعلیم مکمل کرنے کے باوجود وہ ڈگری حاصل نہ کر سکے، کیوں کہ وہ امتحانات پاس نہیں کر پا رہے تھے۔ سرکاری انڈسٹریل ٹریننگ انسٹی ٹیوٹ (آئی ٹی آئی)، جہاں تعلیم تمل زبان میں دی جاتی تھی، ان کے پسندیدہ کورس کا انعقاد ہی نہیں کرتا تھا کیوں کہ اس میں داخلہ لینے والا کوئی اور طالب علم نہیں تھا۔ وہ اپنے والد کے اس قرض کی وجہ سے خود کو قصوروار محسوس کرتے تھے جو انہوں نے ان کی انجینئرنگ کی تعلیم کے لیے لیا تھا، لیکن انگریزی ذریعۂ تعلیم میں انجینئرنگ کی پڑھائی کرنا ان کے لیے انتہائی مشکل ثابت ہوا۔ وہ دراصل اپنے والدین کی خواہش اور دباؤ کے تحت یہ تعلیم حاصل کر رہے تھے۔ بالآخر کئی کوششوں کے بعد ۲۰۲۱ میں انہوں نے انجینئرنگ کی ڈگری حاصل کر لی، لیکن اس دوران کسی نے بھی اس بات پر توجہ نہیں دی کہ ان کی اصل دلچسپی ہمیشہ سنیماٹوگرافی (فلم بندی) میں تھی۔

’’میرا خواب ہمیشہ فلمیں بنانا تھا، لیکن مجھے یہ معلوم نہیں تھا کہ اس شعبے میں آگے کیسے بڑھا جائے۔ میں یوٹیوب پر کورسز تلاش کرتا رہتا تھا، مگر اس وقت میری انگریزی کمزور تھی اور تمل زبان میں سکھانے والے بھی بہت کم تھے۔ میں نے ایم جی آر گورنمنٹ فلم اینڈ ٹیلی ویژن انسٹی ٹیوٹ میں داخلہ کے لیے بھی درخواست دی تھی۔ مجھے انٹرویو کے لیے بلایا بھی گیا، لیکن انٹرویو میں کارکردگی اور ہائی اسکول کے کم نمبروں کی وجہ سے مجھے داخلہ نہیں مل سکا۔

’’اس کے بعد میں نے ایک نجی کالج کا رخ کیا۔ انہوں نے ۴ لاکھ روپے ٹیوشن فیس مانگی، اس کے علاوہ ایک کیمرہ، ایک لیپ ٹاپ، ایک ہارڈ ڈسک اور فوٹوگرافی یا سنیماٹوگرافی میں دو سال کا تجربہ بھی لازمی قرار دیا۔ میرے کزن نے مجھے کوئمبٹور میں اپنے دوست کے اسٹوڈیو میں ملازمت دلوا دی۔ تقریباً چار سے پانچ سال تک میں نے شادیوں، تہواروں اور تجارتی فوٹو شوٹس کی کوریج کی۔ لیکن پھر مجھے احساس ہوا کہ میں دراصل سنیماٹوگرافر بننا چاہتا ہوں۔ تب تک میں اپنی زندگی کے کئی قیمتی سال ضائع کر چکا تھا۔‘‘ اس کے بعد کارتکیئن نے اگلے دو سال کتابیں پڑھنے اور انٹرنیٹ پر فلمیں دیکھنے میں گزارے۔ پھر وہ دوبارہ اسی نجی کالج میں داخلہ لینے گئے، مگر اس وقت تک فیس ۴ لاکھ سے بڑھ کر ۶ لاکھ روپے ہو چکی تھی، جو ان کی استطاعت سے باہر تھی۔

اسی دوران، ۲۰۲۳ میں، ان کی ملاقات ایم پلنی کمار کی فوٹوگرافی ورکشاپس سے ہوئی۔ اگلے تین برسوں تک وہ پیپلز فوٹوگرافرز کلیکٹو کے ساتھ مختلف مقامات کا سفر کرتے رہے، متعدد ورکشاپس میں شرکت کی، اور آخرکار پڈوکوٹئی ضلع کے گورنمنٹ ماڈل اسکول میں طلبہ کو دستاویزی فوٹوگرافی کی تربیت دینا شروع کر دی۔ سال ۲۰۲۶ میں ان کی پہلی تصویری کہانی پاری پر شائع ہوئی۔

’’میں نے دو مختصر فلموں کی شوٹنگ کا کام مکمل کر لیا ہے۔ ان میں سے ایک فلم، ۲۰۲۲ میں انڈین فلم پروجیکٹ [آئی ایف پی] کے لیے تھی۔ دوسری فلم تمل ناڈو میں نان مودھلوَن شارٹ فلمز کے تحت ایک مقابلہ کی لیے تھی، جسے اس مقابلہ میں شامل ہونے والی سرفہرست دس فلموں میں سے منتخب کر لیا گیا۔ اس کے علاوہ میں کاجو کے مزدوروں کی زندگی پر ایک دستاویزی فلم بھی بنا رہا ہوں۔‘‘ کارتکیئن صرف فوٹوگرافی یا تعلیم ہی کی بات نہیں کرتے۔ وہ دوستی، خاندان، مستقبل اور اپنے خوابوں کا بھی ذکر کرتے ہیں – ایسے لہجہ میں جس میں کامیابی کی خوشی، مشکلات کا سامنا کرنے کا حوصلہ اور کبھی ہار نہ ماننے والا عزم صاف جھلکتا ہے۔

’’میں نے ہمت نہیں ہاری۔ میں مسلسل انسٹاگرام پر پلنی انّا کو اپنی تصاویر بھیجتا رہا،‘‘ ۲۵ سالہ کے روی کمار، جو نیلگیری کے جنگلات سے تعلق رکھنے والی ایک اور ثابت قدم آواز ہیں، کہتے ہیں۔ ان کا تعلق نیلگیری کے بوکاپورم گاؤں کی بیٹا کورمبا آدیواسی برادری سے ہے۔ انہوں نے ابتدا میں ’نیلگیری پرٹیکولرلی ولنریبل ٹرائبل گروپ فیڈریشن‘ کے دفتر میں اپنے ایک ساتھی سے فوٹوگرافی سیکھی اور ایک پرانے کیمرہ پر مشق کرتے رہے۔ بعد میں ایک دوست کے ذریعہ انہیں ایم پلنی کمار کے بارے میں معلوم ہوا، تو ان کی خواہش ہوئی کہ وہ ان سے مزید سیکھیں۔

’’یک دن آخرکار انّا نے میرے پیغام کا جواب دیا اور پوچھا کہ کیا مجھے واقعی فوٹوگرافی میں دلچسپی ہے۔ انہوں نے میرے سفر کے اخراجات ادا کیے اور مجھے ایک فوٹوگرافی ورکشاپ کے لیے چنئی بلایا۔ وہیں میں نے کتابیں پڑھیں، مختلف جگہوں کا سفر کیا، تصویریں کھینچیں اور دستاویزی فوٹوگرافی کے بارے میں سیکھا۔ میں اپنی برادری کی کہانی سنانا چاہتا تھا۔‘‘ اس کے بعد روی کی سرکاری ملازمت کے امتحانات کی تیاری میں دلچسپی ختم ہو گئی تھی۔ انہیں اپنی اصل منزل مل چکی تھی۔

لیکن ان کی والدہ، جنہوں نے شوہر کے ذریعہ چھوڑ دیے جانے کے بعد اکیلے ہی اپنے پانچ بچوں کی پرورش کی تھی، اس فیصلہ سے خوش نہیں تھیں۔ ’’وہ چاہتی تھیں کہ میں سرکاری ملازمت کے امتحانات کی تیاری کروں۔ وہ اکثر ڈانٹتے ہوئے کہتیں، ’تم ہر وقت کیمرہ لے کر کیوں گھومتے رہتے ہو؟ یہ سب چھوڑو، جا کر پڑھو اور سرکاری نوکری حاصل کرو۔ یوں گھوم پھر کر تصویریں لینے سے ہمارے گھر میں پیسے نہیں آئیں گے۔‘ پھر ایک دن پلنی انّا اپنے چند شاگردوں کے ساتھ ہمارے گھر آئے اور میری والدہ سے بات کی۔ اس ملاقات کے بعد انہوں نے مجھے ڈانٹنا بند کر دیا۔ بعد میں، میں نے اپنی والدہ کی جدوجہد پر ایک تصویری کہانی تیار کی۔ وہ میری پہلی نمائش میں نہیں آ سکی تھیں، لیکن اس بار وہ میرے ساتھ آئیں گی۔ یہ ان کا چنئی کا پہلا سفر ہوگا۔‘‘ یہ کہتے ہوئے روی کی آواز میں خوشی صاف محسوس ہوتی ہے۔

’’میرا خواب ہے کہ میں اپنی برادری کے لیے کام کرتا رہوں۔ میں نے اپنی آنکھوں سے دیکھا ہے کہ غیر آدیواسی لوگ شراب کے بدلے ہماری برادری کی زمینیں ہتھیا لیتے ہیں۔ وہ آدیواسیوں سے کھیتوں میں کام کرواتے ہیں اور مزدوری کے بجائے انہیں شراب دے دیتے ہیں۔ لوگ سمجھتے ہیں کہ ہمیں پیسوں کی ضرورت نہیں، ہم محنتی نہیں ہیں، اور ہم شراب کی ایک بوتل کے لیے کچھ بھی کرنے کو تیار ہو جاتے ہیں۔ میری گریجویشن مکمل ہونے کے بعد بھی لوگوں نے میرے ساتھ یہی رویہ اختیار کیا۔‘‘ روی اپنی برادری کے صرف تیسرے فرد ہیں جنہوں نے کالج تک تعلیم حاصل کی۔ انہوں نے تاریخ میں بی اے کی ڈگری حاصل کی ہے۔

’’غیر آدیواسی لوگ ہماری برادری کی تصویر جس طرح پیش کرتے ہیں، وہ مجھے پسند نہیں۔ انہوں نے آدیواسیوں کی زمینوں پر ریزورٹس بنا لیے ہیں اور پھر انہی آدیواسیوں کو وہاں مزدور بنا کر رکھ دیا ہے۔ ہم غلام نہیں ہیں۔ ہماری شناخت یہ نہیں ہے۔ ہم ہر روز سخت محنت کر کے اپنی زندگی گزارتے ہیں۔ ہماری برادری میں میری والدہ جیسی بے شمار خواتین ہیں جو اکیلے اپنے بچوں کی پرورش کرتی ہیں۔ وہ کبھی کافی کے باغات سے لکڑیاں جمع کرتی ہیں، کبھی دوسروں کے باغات کی دیکھ بھال کرتی ہیں اور کبھی گوبر کے اُپلے بنا کر فروخت کرتی ہیں۔ اسی لیے میں نے ان کی کہانی لکھی، کیوں کہ میں چاہتا ہوں کہ ہم اپنی کہانیاں خود لکھیں۔‘‘ اپنی برادری کی زندگی کو دستاویزی شکل دیتے ہوئے روی اگلی نسل کو بھی تیار کر رہے ہیں۔ پیپلز فوٹوگرافرز کلیکٹو کے دوسرے اراکین کی طرح وہ بھی اپنی ذمہ داری نئی نسل تک منتقل کرنے کے لیے کوشاں ہیں۔ وہ روزانہ قریب کے قصبے مسِنگُڈی سے دو گھنٹے بس کا سفر کر کے اوٹی پہنچتے ہیں، جہاں نیلگیری ضلع کے گورنمنٹ ماڈل اسکول میں نوجوان طلبہ کو فوٹوگرافی کی تربیت دیتے ہیں۔

حیرالنشاء، نور نشاء، سُبا گومتی، کیرتی، مکیش، کارتکیئن اور روی کمار – سات طلبہ، سات کہانیاں اور سات مختلف زاویۂ نظر۔ یہ سب پیپلز فوٹوگرافرز کلیکٹو کا حصہ ہیں۔ انصاف کی مشترکہ جدوجہد میں متحد، ہر ایک اپنے انفرادی اور اجتماعی مسائل کا مقابلہ ایک کیمرہ ہاتھ میں لیے کر رہا ہے، اور سب کی رہنمائی ایک ہی استاد، ایم پلنی کمار کر رہے ہیں۔ پاری کے لیے یہ باعثِ فخر ہے کہ وہ نہ صرف پلنی کمار بلکہ ان کے ان باصلاحیت شاگردوں کے کام کا بھی گھر اور پلیٹ فارم ہے۔