’ہمارے ہاتھ کام کرتے رہتے ہیں‘

’’چارپائیاں بنانا میرے خون میں شامل ہے،‘‘ چارپائی بُننے والی تیسری نسل کی کرشناوتی مسکراتے ہوئے کہتی ہیں۔ ’’میری شادی بھی ایسے شخص سے ہوئی ہے جسے اس ہنر سے محبت ہے!‘‘ تھارو قبائلی برادری سے تعلق رکھنے والی ۴۵ سالہ خاتون ہمیں بتاتی ہیں۔

تقریباً تین دہائیوں سے کرشناوتی اور ان کے شوہر چندرپال سنگھ رانا رسی والی چارپائیاں بنا رہے ہیں، جن میں لکڑی کے تختوں کی جگہ رسی کا جال بُنا جاتا ہے۔ وہ چارپائی کے پائے لکڑی سے تراشتے اور تیار کرتے ہیں، پھر اس پر رسی بُنتے ہیں۔

گرمیوں میں، جب درجۂ حرارت بڑھ جاتا ہے، لوگ بستروں کے بجائے چارپائیوں کو ترجیح دیتے ہیں، اسی لیے یہ کاریگر مئی سے ستمبر تک کام کرتے ہیں؛ باقی سال وہ زرعی مزدوری کرتے ہیں۔ کرشناوتی روزانہ ۳۵۰ روپے کماتی ہیں جب کہ چندرپال ان سے سو روپے زیادہ پاتے ہیں۔ انہیں سال بھر میں تقریباً ۱۲۰ سے ۱۵۰ دن کام ملتا ہے۔

یہ جوڑا کیتھولیا گاؤں میں رہتا ہے، جہاں تقریباً ۱۲۰۰ لوگ آباد ہیں اور ان میں سے زیادہ تر چھوٹے زرعی قطعات پر کھیتی باڑی کرتے ہیں۔ اپنے پکے گھر سے تقریباً دو سے تین کلومیٹر دور، کرشناوتی اور چندرپال کے پاس ایک ایکڑ زمین ہے جہاں وہ بارانی اور آبپاشی دونوں طریقوں سے کھیتی کرتے ہیں۔ دو بچوں کی ماں کرشناوتی کہتی ہیں، ’’ہم اپنے لیے گیہوں اور دھان اُگاتے ہیں۔‘‘

وہ کہتے ہیں کہ چارپائیاں بنانے سے ہونے والی تقریباً ۵۰ ہزار روپے کی سالانہ آمدنی ان کے لیے کافی اہمیت رکھتی ہے۔ کرشناوتی کہتی ہیں، ’’جب پورا گاؤں سو جاتا ہے، تب بھی ہمارے ہاتھ چلتے رہتے ہیں۔ چاہے آدھی رات ہو یا دو بجے، چارپائی مکمل کرنی ہی پڑتی ہے۔‘‘

اس جوڑے نے گزشتہ ۱۰ برسوں میں ۱۶۰۰ سے زیادہ چارپائیاں بنائی ہیں – یعنی اوسطاً سالانہ تقریباً ۱۶۰ چارپائیاں۔ وہ ایک چارپائی بُننے کے ۴۰۰-۵۰۰ روپے لیتے ہیں۔

گاہک آس پاس کے ٹکولی، نگرا، سرونجا اور بچھوا جیسے قصبوں اور گاؤوں سے آتے ہیں، جو پانچ سے ۱۰ کلومیٹر کے فاصلہ پر واقع ہیں۔ جو لوگ آرڈر دیتے ہیں، وہ رسی اور لکڑی بھی فراہم کرتے ہیں – عموماً شیشم (ڈلبرگیا سیسو) کی لکڑی،کیوں کہ یہ مضبوط اور پائیدار ہوتی ہے، لیکن آسانی سے دستیاب ہونے کی وجہ سے آم یا نیم کی لکڑی بھی استعمال کی جاتی ہے۔

پہلا مرحلہ چارپائی کا شہتیر (بیم)تیار کرنا ہوتا ہے، جسے چندرپال چار لکڑی کے ٹکڑوں سے بناتے ہیں – جس میں دو ٹکڑے چھ فٹ کے اور دو ٹکڑے تین فٹ کے ہوتے ہیں۔ اس کے بعد چارپائی کے چار پائے نانک متا کے ایک بڑھئی کے پاس بھیجے جاتے ہیں جو ان پر نقش و نگار بناتا ہے اور سوراخ تیار کرتا ہے جن میں شہتیر آسانی سے فِٹ ہو سکے۔ اس کے بعد چندرپال چارپائی کی بنیاد کو شکل دیتے ہیں اور اسے چمکدار بنانے کے لیے پینٹ کرتے ہیں۔

بُنائی کے لیے چندرپال دائیں سے بائیں پلاسٹک کی رسی بُن کر داون یا بنیاد تیار کرتے ہیں۔ اس کے بعد کرشناوتی کی باری آتی ہے۔

’’میں دن میں دو سے تین چارپائیاں بُن لیتی ہوں،‘‘ وہ کہتی ہیں۔ زنجیری چارپائی بُننے میں تقریباً تین گھنٹے لگتے ہیں۔ ’’سوکیدار [کپاس کی بُنائی والی] چارپائی بڑی اور بھاری ہوتی ہے، اس لیے اسے میں اور میرے شوہر ساتھ مل کر بُنتے ہیں،‘‘ وہ مزید کہتی ہیں۔ کرشناوتی نے تیسری جماعت کے بعد اسکول چھوڑ دیا تھا اور زیادہ وقت اپنے والد کے ساتھ گزارا۔ ’’جب وہ اسے بُنتے تھے تو میں رسی پکڑتی تھی۔ مجھے ہمیشہ یہ تجسس رہتا تھا کہ مکمل چارپائی کیسی ہوگی۔‘‘